Mungesa e energjisë elektrike: Faji nuk qëndron te Qeveria, por te rrjeti i KEDS-it

Dëgjova në lajmet e RTK-së duke akuzuar qeverinë për reduktimin e energjisë elektrike në disa rajone ose komuna të Kosovës.

Kjo është mosnjohje e realitetit energjetik.

Megjithatë, le të kalojmë te problemi i vërtetë.

Kur shohim ato shtylla të lakuara, të cilat janë në prag të rënies dhe përbëjnë rrezik për qytetarët, fëmijët dhe bagëtinë, lind pyetja: sa të gatshme janë ato në këtë gjendje për të transmetuar energjinë elektrike pa defekte të përditshme?

Faji qëndron te mosinvestimet e KEDS-it, i cili ka premtuar dhe është i obliguar me kontratë të sigurojë një rrjet të sigurt për transmetimin e energjisë tek konsumatorët.

Këto investime duhet të kryhen gjatë sezonit veror dhe jo siç po thonë përfaqësuesit e KEDS-it ekipet e tyre po punojnë 24 orë për sanimin e situatës.

Në këtë periudhë, është e pamundur të sanosh situata dhe vetëm sa rrezikohen punëtorët e mjerë, që mund t’u kushtojë edhe me jetë.

Pra, faji është vetëm te KEDS-i për shkak të rrjetave të dobëta.

Të gjithë në Kosovë e dinë se qeveria ka subvencionuar konsumatorët për shpenzimin e energjisë, si dhe për blerjen e aparateve EKO, të njohura si klima për ngrohje gjatë dimrit.

KEDS-i e di mirë se këto aparate do të sjellin ngarkesa shtesë, prandaj investimi në forcimin e rrjetit ka qenë i domosdoshëm.

Megjithatë, KEDS-i e di se ky popull është i durueshëm, dhe partitë politike, përfshirë opozitën, nuk po kërkojnë zgjidhje aty ku duhet, por po përpiqen të rrëzojnë qeverinë, kurse dihet se kush e ka nënshkruar kontratën për privatizimin e KEDS-it.

Pra, të nderuar, faji është te:

• Rrjetat e dobëta
• Shtyllat në tokë
• Trafot me kapacitet të dobët për furnizim të bollshëm të konsumatorëve me energji
• Moskryerja e punëve në rrjet gjatë sezonit të verës
• Mos sigurimi i energjisë gjatë sezonit veror për shkak të mungesës së energjisë gjatë dimrit
• Pra, faji është vetëm te KEDS-i, dhe ne e dimë se ka ngarkesa, por mundësitë për të evituar reduktimin kanë qenë dhe janë të pranishme. Kjo është një neglizhencë dhe papërgjegjshmëri e KEDS-it.

……………………….

(Autori ka punuar 42 vjet në Elektroekonominë e dikurshme, pastaj KEK, kurse sot KEDS.)