Ndezja e shkrepsës e shkaktoi shpërthimin e bombolës së gazit në Gjilan

Si pasojë e shpërthimit të një bombole gazi në depon e një shtëpie në lagjen “Shadërvan” në Gjilan, ka pësuar lëndime trupore pronari i shtëpisë dhe janë shkaktuar dëme të konsiderueshme materiale.

Policia njofton sot se shpërthimi i bombolës së gazit dyshohet të ketë ndodhur nga ndezja e cigares.

Njoftimi i plotë i policisë:

Shadërvani i artarëve, Gjilan 07.08.2021 – 10:49. Është raportuar për një shpërthim në depon e shtëpisë së viktimës mashkull kosovar i cili kur kishte hyrë në depo kishte ndezur cigaren dhe kishte ndodhur shpërthimi i një bombole të gazit nga e cila dyshohet se kishte rrjedhur gazi në hapësirën e depos. Nga shpërthimi lëndime të rënda trupore ka pësuar viktima i cili është dërguar për tretman mjekësor. Përveç lëndimit të viktimës janë shkaktuar dëme të konsiderueshme materiale në objekt dhe dy vetura.