Nëse me të vërtetë e doni këtë vend – tërhiquni

Majlinda Sulejmani

Si politikane nga Zvicra, po e ndjek me shqetësim mënyrën se si ambiciet personale po vendosen mbi përgjegjësinë demokratike në Kosovë.

Për këtë arsye, po ju drejtohem drejtpërdrejt, znj. Albulena Haxhiu:

Nëse një person refuzohet 16 herë nga Kuvendi për t’u zgjedhur Kryetare e tij, është momenti për t’u ndalur dhe për të bërë një pyetje shumë të thjeshtë: “A jam unë vërtet personi i duhur për këtë detyrë?”

Fakti që keni marrë shumë vota si deputete është i rëndësishëm, por nuk është i mjaftueshëm.

Në një demokraci, nuk mjafton vetëm mbështetja nga baza – duhet të kesh besimin e shumicës në Kuvend.

Nëse ky besim mungon, kandidatura humb kuptimin.

Me këmbënguljen tuaj, po e mbani peng institucionin më të lartë ligjvënës të vendit.

Kuvendi nuk është skenë për ego personale – është zemra e funksionimit demokratik të shtetit.

Në Zvicër, një politikane në pozitën tuaj do ta kishte kuptuar se kur nuk ke mbështetjen e shumicës, tërhiqesh me dinjitet – dhe i hap rrugë zgjidhjes.

Kosova nuk ka luksin të humbasë kohë me dramë politike.

Kosova ka nevojë për udhëheqje të pjekur, të aftë për të bashkuar – jo për të ndarë.

Prandaj, nëse me të vërtetë e doni këtë vend: Tërhiquni, jepni hapësirë dikujt që mund të ndërtojë ura, jo të thellojë krizën.

E ardhmja e Kosovës kërkon lidership me vizion, jo me kokëfortësi.