Shembet ndërtesa, vdes fëmija 4-vjeç, nëna në gjendje kritike
Një fëmijë 4-vjeçar ka mbetur i vdekur, derisa nëna e tij ka marrë lëndime nga shembja e një ndërtese në Torino të Italisë.
Mediat italiane bëjnë me dije se djali 4-vjeç, i identifikuar si Aron, ka vdekur, ndërsa nëna 34-vjeçe u nxor nga rrënojat dhe u dërgua në urgjencë së bashku me një 22-vjeçar me origjinë rumune. Të dy janë në gjendje kritike, ndërsa edhe një tjetër person ka mbetur i plagosur.
Babai shqiptar, 40-vjeç nuk ishte në shtëpi, por shkoi në urgjencë në gjendje shoku për shkak të ngjarjes së rëndë. I riu 22-vjeçar që jetonte në një tjetër apartament ka pësuar djegie në 50% të trupit.
Sot ishte ditëlindja e tij dhe po nisej për në punë kur ndodhi shpërthimi. I plagosuri i tretë është një djalë tjetër 22-vjeçar me origjinë siciliane, i cili pësoi një thyerje në legen dhe dëmtim në kokë.
Zhurma e shpërthimit të gazit u dëgjua deri në rrethin Madonna di Campagna. Shpërthimi i shkaktuar nga rrjedhja e gazit ndodhi në një ndërtesë dy katëshe me 6 apartamente, ku jetojnë kryesisht familje me origjinë shqiptare dhe rumune.
