Shpërthejnë dy granata dore në Prishtinë
Në Prishtinë kanë shpërthyer sonte vonë dy granata. Policia ka bllokuar zonën rreth hotelit “Princi i Arbërit”, për shkak se dyshohet që në afërsi të tij janë hedhur granatat.
Lajmin për Gazeta Express e ka konfirmuar zëdhënësi i Policisë së Kosovës për rajonin e Prishtinës, Agron Borovci.
“Rreth orës 22:00 është raportuar se në rrugën ”Asllan Pireva” në Prishtinë janë dëgjuar detonime.
Menjëherë pas marrjes së kësaj informate policia ka dalë në vendin e ngjarjes, me ç’ rast ka ndërmarrë të gjitha veprimet e nevojshme, të sigurisë si dhe ato hetimore-ekzaminuese.
Burime të Gazetës Express bëjnë me dije se policia janë në kërkim të tre të dyshuarve, të cilët besohet të kenë hedhur granatat.
Express gjithashtu mëson se nuk ka pasur ndonjë lëndim nga shpërthimi.
Policia e Kosovës ka dalë në vendin e ngjarjes dhe është duke e menaxhuar situatën.
“Aktualisht të gjitha njësitë e nevojshme policore për të menaxhuar me situatën dhe hetuar rrethanat e rastit janë në vendin e ngjarjes dhe po kryejnë veprimet e duhura policore”, ka thënë Borovci. (Foto arkiv)
