Tregu i vjetër i Gjilanit – vendi ku njerëzit nuk shkonin vetëm për të blerë e shitur, por edhe për t’u takuar e për të shkëmbyer llafe ndërmejt vete

Tregu i vjetër në Gjilan, në vitet e 60-ta ishte zemra ekonomike dhe shoqërore e qytetit.

Aty mblidheshin tregtarë, zejtarë dhe fshatarë nga e gjithë Anamorava, për të shitur prodhimet e tyre dhe për të furnizuar qytetin me mallra të ndryshme.

Çdo ditë tregu ishte i mbushur me njerëz. Në tezgë shiteshin drithëra, djathë, gjalpë, mjaltë, vezë dhe produkte të tjera.

Përveç tyre, aty mund të gjendeshin qepë e spanak të freskët nga bashqet e gilanlive, e shumë artikuj të nevojshëm për jetën e përditshme.

Pranë tregut ndodheshin edhe punishtet e zejtarëve të njohur të qytetit: terzinj, opingarë, samarxhinj, farkëtarë, teneqexhinj dhe orëndreqës.

Atmosfera ishte e veçantë. Dëgjoheshin zhurmat e çekanëve, bisedat e tregtarëve dhe pazaret që zhvilloheshin çdo ditë.

Në atë periudhë, Gjilani po zhvillohej me ritme të shpejta, por tregu i vjetër ruante ende frymën tradicionale.

Njerëzit nuk shkonin aty vetëm për të blerë e shitur, por edhe për t’u takuar, për të shkëmbyer llafe e për të forcuar lidhjet shoqërore.

Tregu i vjetër ishte një pasqyrë e gjallë e traditës dhe kulturës së qytetit.

Veshjet popullore, dialektet e ndryshme dhe zakonet e tregtisë i jepnin këtij vendi një gjallëri të veçantë.

Aty ndërthureshin jeta qytetare me atë fshatare, duke e bërë tregun një nga vendet më të rëndësishme të Gjilanit.

Më vonë, në vendin ku dikur zhvillohej tregu tradicional, u ndërtua Shtëpia e Mallrave, një objekt modern për kohën që simbolizoi zhvillimin urban dhe ekonomik të qytetit.

Ky ndryshim shënoi kalimin nga tregtia tradicionale drejt një forme më bashkëkohore të shitjes dhe furnizimit.

Sot, kujtimet për tregun e dikurshëm në Gjilan mbeten të gjalla në rrëfimet e qytetarëve më të vjetër.

Ai përfaqëson një periudhë të rëndësishme të historisë së qytetit, kur tregtia, zejet dhe marrëdhëniet njerëzore krijonin një atmosferë të veçantë që shumëkush e kujton me nostalgji dhe respekt./Ismajl Veliu