Veseli e akuzon Kurtin: Ma mori idenë për heqjen e taksës

Kryetari i PDK’së, Kadri Veseli, ka reaguar pas vendimi të kryeministrit të Kosovës, Albin Kurti, për largimin me kushte të taksës ndaj Serbisë dhe Bosnje e Hercegovinës. Veseli thotë se Kurti nuk i respektoi të drejtat e autorit kur e mori këtë vendim.

“Asgjë e re nga Albini! Të paktën, ta respektonte të drejtën e autorit. Sepse, vendimi i tij për taksën dhe reciprocitetin qenka huazuar nga ideja e propozimit tim të janarit të vitit 2019, të cilin, si çdo gjë tjetër, ai e pat refuzuar”, ka shkruar Veseli në faqen e tij në Facebook.

Ai thotë se Kurti sa ishte në opozitë kishte ideale tjera, ndërsa tani që mori pushtetin po e djeg veten më shpejt se sa që kanë pritur të tjerët.

“Si opozitar, ishte në gjendje ta digjte Kosovën dhe të përdorte dhunë dhe jetë të rinjsh idealistë për të ardhur në pushtet. Sot, kur udhëheq Qeverinë, ideali i tij po shihet se është vetëm mbajtja e pushtetit. Duke u shantazhuar, po e djeg veten më shpejtë sesa që kanë pritur të tjerët”, shton ai.