Vritet me armë zjarri një 35-vjeçar i cili sapo ishte kthyer nga Spanja

Një 35-vjeçar është vrarë rreth orës 22:00 me armë zjarri, në rrethana të paqarta. Merret vesh se viktima është Delon Troqe, 35-vjeç. Ai ka ndërruar jetë në spitalin e Vlorës.

I ndjeri, 10-15 ditë më parë ishte kthyer nga Spanja. Policia ka mbërritur në vendngjarje. Disa persona që mund të kenë dijeni për ngjarjen, janë shoqëruar në polici, si dhe janë sekuestruar edhe pamjet filmike.

Deklarata e plotë:

Vlorë/Informacion paraprak

Rreth orës 21:50, në lagjen “Pavarsia”, Vlorë, në rrethana ende të pa qarta është qëlluar me armë zjarri shtetasi D. T., 38 vjeç, banues në Vlorë, i cili si pasojë e plagëve të marra ka ndërruar jetë në spitalin e Vlorës.

Shërbimet e Policisë kanë mbërritur menjëherë në vendgjarje ku është rrethuar zona dhe janë ngritur pika kontrolli në hyrje dhe në dalje të qytetit dhe përgjatë rrugëve që lidhin njësitë administrative me qëllim kapjen e autorit/ve.

Gjatë krehjes së zonës, në fshatin “Sherishtë”, nga shërbimet e Policisë është konstatuar duke u djegur një automjet i braktisur, i cili paraprakisht dyshohet se mund të jetë i autorit/ve të ngjarjes.

Gjithashtu janë shoqëruar në Komisariat disa shtetas të cilët dyshohen se kanë dijeni për ngjarjen.

Grupi hetimor po vijon punën për sekuestrimin e çdo prove materiale që do ti shërbej zbardhjes së ngjarjes dhe identifikimit të autorit/ve.