Djegia e lëkurës në plazh – një rrezik që mund të çojë deri te kanceri i lëkurës

Sabedin Sherifi

Ekspozimi i pakontrolluar në diell nuk sjell vetëm nxirje, por mund të shkaktojë dëmtime serioze dhe afatgjata.

Vera është stina e pushimeve dhe e plazhit, por bashkë me kënaqësinë e rrezeve të diellit vjen edhe një rrezik që shpesh neglizhohet: djegia e lëkurës.

Shumë njerëz mendojnë se skuqja e lëkurës pas një dite në plazh është normale, por në të vërtetë ajo është një shenjë e dëmtimit të qelizave të lëkurës nga rrezet ultravjollcë (UV).

Ekspozimi i tepërt dhe i përsëritur ndaj diellit rrit ndjeshëm rrezikun për zhvillimin e kancerit të lëkurës.

Rrezet UV dëmtojnë ADN-në e qelizave dhe, me kalimin e viteve, këto dëmtime mund të grumbullohen dhe të shndërrohen në tumore të lëkurës.

Një nga format më të rrezikshme është melanoma, e cila mund të përhapet në organe të tjera nëse nuk diagnostikohet dhe trajtohet në kohë.

Shenjat që nuk duhen neglizhuar janë ndryshimet në nishane, shfaqja e njollave të reja, plagët që nuk shërohen, gjakderdhja ose kruarja e vazhdueshme e një lezioni në lëkurë.

Çdo ndryshim i dyshimtë duhet të kontrollohet nga një mjek dermatolog.

Rreziku është më i madh te personat me lëkurë të çelët, fëmijët, të moshuarit dhe ata që kalojnë shumë kohë në diell pa mbrojtje.

Megjithatë, askush nuk është plotësisht i mbrojtur nga dëmet e rrezatimit UV.

Mbrojtja është e thjeshtë dhe shumë efektive: shmangni ekspozimin në diell nga ora 11:00 deri në 16:00, përdorni krem mbrojtës me faktor SPF 30 ose 50, aplikojeni rregullisht, mbani kapelë me strehë, syze me mbrojtje UV dhe veshje të lehta që mbulojnë lëkurën.

Gjithashtu, konsumoni mjaftueshëm ujë për të shmangur dehidratimin.

Nëse pësoni djegie nga dielli, largohuni menjëherë nga rrezet, freskoni lëkurën me kompresa të ftohta, hidratohuni dhe shmangni ekspozimin e mëtejshëm derisa lëkura të shërohet.

Nëse djegia shoqërohet me flluska të shumta, temperaturë, marramendje ose gjendje të rënduar, kërkoni ndihmë mjekësore.

Një nxirje e përkohshme nuk ia vlen të rrezikojë shëndetin. Kujdesi ndaj lëkurës sot është një investim për të ardhmen.

Mbrojtja nga dielli ul ndjeshëm rrezikun e djegieve, plakjes së parakohshme të lëkurës dhe zhvillimit të kancerit të lëkurës..