Dy kosovarë humbin jetën në dy raste të ndara në Slloveni

Dy mërgimtarë nga Kosova kanë humbur jetën në Slloveni brenda pak ditësh, në raste të ndara nga njëri-tjetri.

Lajmin e ka bërë të ditur Ambasada e Kosovës në Slloveni. Sipas njoftimit të ambasadës, Ilirijan Bytyqi 19-vjeç nga Suhareka ka humbur jetën në një aksident në punë.

Ndërkaq, Nazif Saramati, 34-vjeç, nga Prizreni, ka vdekur mbrëmë si pasojë e lëndimeve të marra në një aksident.

Ambasadori Avni Kastrati dhe stafi i Ambasadës kanë ngushëlluar familjet Bytyqi dhe Saramati.

Njoftimi i plotë i Ambasadës:

Telegram ngushëllimi

Javë e rëndë për ne dhe diasporën tonë!

Gjatë kësaj jave humbën jetën dy të rinjë nga Kosova.

Ambasada e Republikës së Kosovës në Slloveni i shpreh ngushëllime Familjes Bytyqi nga Suhareka për Ilirijan Bytyqin 19 vjeç, i cili vdiq në një aksident në punë dhe po ashtu i shpreh ngushëllime Familjes Saramati nga Prizreni për Nazif Saramatin 34 vjeç, i cili ndrroi jetë mbrëmë në një aksident.

Ndajmë dhimbjen me Familjet dhe shprehim ngushëllimet më të sinqerta.

Ambasada është përkujdesur për procedurat përkatëse.

Ambasadori Avni Kastrati dhe Stafi i Ambasadës.