Europa ku ka më shumë burra se gra, Kosova dominohet lehtë nga gratë

Kosova regjistron 103.8 gra për çdo 100 burra, sipas të dhënave të Eurostat për vitin 2022, duke u renditur ndër vendet europiane ku raporti mes gjinive është më i balancuar, shkruan express.

Në rajon, Kosova ka një diferencë të vogël mes numrit të grave dhe burrave. Shqipëria ka 102.2 gra për 100 burra, një raport pothuajse i njëjtë me Irlandën dhe më i ulët se mesatarja e Bashkimit Europian prej 104.2 grash për 100 burra.

Maqedonia e Veriut ka raportin më të ulët në rajon me 101.9 gra për 100 burra, ndërsa Mali i Zi regjistron 103.3 dhe Serbia 105.6.

Në nivel europian, gratë janë mesatarisht më të shumta se burrat. Bashkimi Europian numëron 104.2 gra për çdo 100 burra, që nënkupton një epërsi prej rreth 4.2 për qind të grave në popullsi.

Diferencat më të mëdha shfaqen në vendet baltike. Letonia kryeson me 115.6 gra për 100 burra, e ndjekur nga Estonia me 110.8 dhe Lituania me 110.4. Në këto vende, hendeku lidhet kryesisht me jetëgjatësinë më të madhe të grave, vdekshmërinë më të lartë të burrave dhe ndikimin e migracionit.

Sipas të dhënave europiane, gratë jetojnë më gjatë se burrat në të gjitha vendet e BE-së. Në Letoni diferenca në jetëgjatësi arrin rreth 10 vjet, në Lituani rreth 9 vjet, ndërsa në Estoni afro 8.8 vjet.

Në anën tjetër, vendet ku burrat janë më të shumtë janë të rralla. Nga 41 shtete të raportuara nga Eurostat, vetëm gjashtë kanë më pak se 100 gra për 100 burra.

Malta ka raportin më të ulët me 88.3 gra për 100 burra, e ndjekur nga Islanda, Norvegjia, Sllovenia, Suedia dhe Luksemburgu.

Në këto raste, struktura më e re e popullsisë dhe migracioni për punë, që shpesh përfshin më shumë meshkuj, ndikojnë në ndryshimin e raportit gjinor.