Koronavirusi merr edhe një jetë në Gjilan, Haziri shpreh dhimbje dhe bën thirrje për kujdes
Në ditën e 111 të ballafaqimit me pandeminë globale Covid-19, Gjilani ka marrë një lajm të hidhur nga Klinika Infektive në Prishtinë, ku ka ndërruar jetë Isuf Murati (1957).
Kryetari i Komunës së Gjilanit, Lutfi Haziri e ka konfirmuar rastin e vdekjes së qytetarit të katërt nga kjo sëmundje infektive dhe i ka shprehur ngushëllime familjes duke e garantuar se gjithmonë do të jenë pranë tyre.
“Fatkeqësisht në përballjen me pandeminë globale Covid-19, sot nga jeta është ndarë edhe qytetari i Gjilanit, i katërti në këtë pandemi, Isuf Murati. Nga njoftimi që kemi marrë prej Qendrës Klinike Infektive në Prishtinë, sot ishte një lajm i vështirë për të gjithë ne. Ngushëllojmë familjen dhe garantojmë se do të jemi pranë tyre në këto ditë të vështira, sepse nuk e kanë të lehtë ballafaqimin me këtë ndarje nga më i dashuri i tyre. Ceremonia e varrimit do të organizohet nga Komuna e Gjilanit në kushte pandemie”, ka thënë kryetari Haziri, në adresimin e tij për publikun.
Kryetari Haziri ka bërë apel te të gjithë qytetarët, bizneset dhe institucionet që në asnjë moment mos ta neglizhojnë rrezikun nga virusi, sepse ai po merr jetë njerëzish.
“Apeloj te të gjithë qytetarët ti respektojnë masat mbrojtëse sipas rekomandimeve të profesionistëve, maskat, dorezat, distanca, sepse janë baza e të jetuarit në përditshmërinë tonë. Nuk duhet shmangur këto rekomandime sepse ky virus është një kërrcënim i shëndetit publik. Mos jep shërbim dhe mos u shërbe askund, nëse nuk përdoren masat mbrojtëse. Kujdes maksimal për të gjithë kudo që jeni”, ka përfunduar kryetari Haziri.
Përndryshe, deri më tani, në përballjen prej 111 ditëve me pandeminë globale Covid, 170 qytetarë që kanë rezultuar pozitivë në komunën e Gjilanit, prej tyre 109 janë shëruar plotësisht, 58 raste janë aktive dhe fatkeqësisht 4 qytetarë janë ndarë nga jeta.
