Kosovari futet në flakë për ta shpëtuar një serbe në Zvicër

Ajo që ka bërë një kosovar në Kosovari në Zvicër, duket e pabesueshme. Ai u fut në flakë për ta shpëtuar një serbe.

“Unë kisha vdekur dhe u ringjalla sërish”. Kështu e përmbledh Ivana mbrëmjen e 24 prillit, kur shtëpia e saj u vu në flakë. Atë e shpëtoi një shqiptar nga Kosova.

Ivana qëndroi në spital katër ditë, për t`u rikthyer në shtëpi më pas. Fundi i lumtur u mundësua nga guximi i Mexhidit, i cili po kalonte rastësisht kah shtëpia e Ivanës, kur atë e kishin kapluar flakët.

“Dikush po bërtiste në një ballkon. Tymi po vinte nga dritaret e poshtme. Hyra aty, por kishte aq tym, sa nuk mund ta gjeja askënd. Dola jashtë të merrja frymë dhe hyra prapë. Aty munda ta tërhiqja Ivanën deri të dritarja, por s’mund ta nxirrja jashtë. Një fqinj ma dha një leckë të lagur, hyra prapë se mendoja se ishte një fëmijë brenda. Nuk ishte. Më pas, zjarrfikësit arritën”, thuhet në rrëfimin e kosovarit, të cilin e citon mediumi zviceran.

20min.ch shkruan (përcjellë express) se ngjarja është edhe më e bukur, meqenëse Ivana është me origjinë serbe, ndërsa Mexhidi – kosovar, duke përmendur se dy popujt kanë qenë në luftë mes vete.

“Ai hodhi veten në zjarr, e të tjerët do të mendonin për veten”, ka thënë Ivana, e cila buzëqesh me ndodhinë që “një kosovar ta shpëtojë një serbe në natën e Pashkëve Ortodokse, në mes të Ramazanit”

Njëzetegjashtë vjecari kosovar, i cili qëndroi në spital për një ditë, nuk e ka ditur origjinën e Ivanës. Por, ai thotë, se edhe po ta dinte, nuk do të ndryshonte asgjë.

“Edhe po ta dija, nuk do të ndryshonte asgjë. Kisha një jetë për ta shpëtuar, nuk ka lidhje shqiptar a serb”, thotë Mexhidi.

Ivana betohet se “kurrë nuk do ta zhgënjejë” djalin që e konsideron si shpëtimtar të saj.