Lutfi Haziri: Emërimi i Rashiqit e përjashtoi Kurtin nga Samiti historik i Tiranës!

Nënkryetari i parë i LDK-së, Lutfi Haziri, ka paraqitur një ‘mal’ kritikash ndaj kryeministrit Albin Kurti, duke thënë se është politikani më jokonsistent në Kosovë.

Në një reagim të gjatë në profilin e tij në Facebook, Haziri e ka kritikuar Kurtin për emërimin e ministrit për Kthim dhe Komunitete, Nenad Rashit, e të cilit, sipas tij, i referohej  dikur me “Sërbët e Thaci”.

Madje, sipas nënkryetarit të LDK-së, emërimi i Rashiqit e përjashtoi Kurtin nga Samiti historik i Tiranës.

Postimi plotë i Lutfi Hazirit:

Emërimi i Rashiqit e përjashtoi Kurtin nga Samiti historik i Tiranës!

Kurti akuzon qeveritë e kaluara për çdo gjë, por emëron ministra nga e kaluara prej Listës “Povratak”. Dikur kësaj liste i referohej me “Serbët e Thaçit” e sot po të njëjtit i rehabiliton në Kabinet ministrash.

E sot, kur e tërë Europa zbarkoi në Samitin historik e më të madhin të organizuar ndonjëherë në Tiranë, Kurti u la jashtë dhe e përcolli prej Prishtinës. Duket se emërimi i Rashiqit e përjashtoi Kurtin nga Samiti historik i Tiranës!

Kurti është figura më kontraverze e politikës kosovare dhe njeriu që nuk ka fare konsistencë në qëndrime. Sa për rikujtim, Kurti pati thënë se kur të vije në krye të Qeverisë nuk do të takohet me Vuçiqin, se nuk e di dhe nuk do t’ia dijë për presionin ndërkombëtar, se do ta rikthejë flamurin kuq e zi e do ta heq atë ‘lara-lara’, se do ta bëjë bashkimin kombëtar, se do a shtrijë sovranitetin në veri, se nuk do të ketë korrupsion e nepotizëm, se do ta çkap shtetin, që do t’ua ul pagën vetit e çka s’pati thënë se!

Por, e bëri saktësisht të kundërtën. U takua me Vuçiqin pa asnjë kusht, hoqi dorë nga konfiskimi dhe gjobat për targat, madje e negocioi në tavolinë vendimin e Qeverisë së Kosovës me Vuçiqin.

Flamurin, siç i thoshte ai, ‘lara-lara’, e mban tash me krenari dhe nuk u betua më me atë kuq e zi, bashkimin kombëtar e harroi, dhe për me keq, si asnjëherë më parë, i prishi raportet me udhëheqësit e Republikës së Shqipërisë.

Akoma pa i mbush një vit qeverisje, skandalet korruptive pëlcitën ne dikastere qeveritare, derisa nepotizmi dhe kapja e shtetit s’ka qenë kurrë më e theksuar.

Me Ligjin e propozuar për zyrtarët publikë, Kurti po ia rrit pagën vetit bukur shumë e po ua zvogëlon prokurorëve e gjyqtarëve.

Miqësinë permanente me ShBA-të, të krijuar me shumë mund para 32 vjetësh nga Presidenti Rugova, e rrezikoi seriozisht.

Në veri jo që nuk e shtriu sovranitetin, por me veprimet e deklaratat populliste të muajve të fundit hoqi dorë krejtësisht, u dorëzua, si gjithmonë. Në këtë moment atje gjendja është më alarmantja që prej shpalljes Pavarësisë. Pra, shenjat janë që zgjedhjet nuk mund të mbahen në katër komunat e veriut.

Pra, veç keni pengu për vizat, asgjë s’keni bërë për MSA e NATO, përpos raporteve të tensionuara me ta.

Për fund, mund të themi se dallimi i Kurtit si kryeministër nga Kurti opozitar është si nata me ditën. Por, siç e thotë populli: Marrja askënd nuk e ka mbytë!