Milazim Thaçi: Menojsha me e gju me bardak Millosheviqin në Hagë

I mbijetuari i masakrës së Izbicës, Milazim Thaçi, ka rrëfyer për ballafaqimin me Sllobodan Millosheviqin në Hagë. Ai tha se me Millosheviqin janë ballafaquar sy me sy në Hagë dhe tregoi se ai ka ditur më shumë gjëra për territorin e Skenderajt sesa që kanë ditur ata.

Thaçi më tutje deklaroi se për inat të Millosheviqit ai ka hyrë në seancën e gjykimit me plis të bardhë.

“Para se me hy aty dy policë më pyeten se cili është Thaçi. Ata më pyeten se a po don me hi me plis te bardhë a pa plis. Unë i thash po hi me plis të bardhë se edhe Slloba e ka mërzi. Ai ja ka nis me kesh. Gazetarët një minutë a dy kanë fotografu për disa momente mu e Slloben. Ai kqyr mu, une kqyr ata. Në sy e kqyrsha veç për inati”, tha ai në T7.

Më tutje, Thaçi tregoi se si Millosheviqi i ka ditur territoret edhe me dallim prej 200 metra.

“Gjykatësi tha që Thaçi duhet me u betu dhe me i tregu veç të drejtat. Unë thash çka di me fol për masakrën e Izbicës ka me fol, për tjerat nuk di. Slloba ja nisi me m’vet pse ke ik prej shpije. I thash se jom tut, se kanë ba masakra serbët tu. Më tha çfarë masakra. Ja përmenda krejt edhe Izbicën. Tha sa kilometra i ka Izbica prej Buroje. I thash sdi gja se nuk i kom mat. Më tha 7. Ai i dike ma mirë se na krejt. Me 200 metra i dike. Me kë kufizohen krejt rend dhe tha juve iu kanë vra UÇK-ja”, rrëfeu Thaçi.

I mbijetuari i Izbicës tregoi se Millosheviqi e pyeti se çfarë e ka Hashim Thaçin.

“Më tha çka e ki Hashimin. I thash kushëri. Më tha të familjes së ngushtë. I thashë po. Nuk foli ma asgjë e as unë nuk fola më asgjë”, deklaroi ai.

Ndër të tjera ai tregoi edhe për mendimin që kishte kur e pa Millosheviqin në sallën e gjyqit. Ai tregoi se si i ka shkuar mendja që ta gjuajë me gotë ose me këpucë atë.

“Unë menojsha, ma kisha dashtë me e gju bardak se mem pa than ki miliarda, veç me gju nihere me bardak ose këpucë, po më bërtiten dy ditë përpara. E kam planifiku edhe zemra e shpirti ma ka dashtë, po më thanë që s’bon. Se me thanë e kallxon karakterin se çka je e kush je, se më shkoj temperatura në 90”, tha ai.