PDK: Katër asambleistë i bënë dëm degës me qëndrimet e tyre
Qëndrimi distancues i katër këshilltarëve komunalë (PDK) ndaj sjelljeve dhe veprimeve të kreut aktual të degës së PDK-së në Gjilan dhe të shefit të Grupit të këshilltarëve të PDK-së, në rastin e projektit të varrezave të reja të qytetit, e ka nxitur kryesinë e degës së këtij subjekti që të analizojë situatën dhe të dalë me disa rekomandime.
Pas situatës së krijuar papritur me qëndrimin e disa këshilltarëve të Partisë Demokratike të Kosovës në Kuvendin e Komunës, Kryesia e Degës, me datë 16.12.2019 mbajti seancë të veçantë, në të cilën e shqyrtoi përmbajtësish qëndrimin e tyre dhe doli me këto konkluzione:
U konstatua se këshilltarët në fjalë, me veprimin dhe qëndrimin e tyre i bënë dëm publik Degës së PDK-së në Gjilan dhe Partisë në përgjithësi.
Kryesia e degës distancohet qartë nga veprimet e pakoordinuara dhe pa konsultim të këtyre këshilltarëve me grupin e këshilltarëve si tërësi dhe me kryesinë e degës.
Kryesia me unanimitet të plotë u distancua nga këto veprime të këtyre këshilltarëve dhe ky distancim do të vlejë deri në një vendim tjetër të saj në ditët që vinë rreth kësaj problematike.
Asnjë veprim apo paraqitje publike e ndonjë individi pa harmonizim me kryesinë e degës dhe në frymën e programit të saj nuk konsiderohet akt i degës së Partisë Demokratike të Kosovës në Gjilan.
Kryesia e degës diskutoi në frymën e tolerancës dhe unitetit të plotë në degë dhe në këtë ambient mori qëndrim që këtyre këshilltarëve tu ipet mundësia e komunikimit me degën (me Kryetarin e degës, kryesinë dhe me grupin e këshilltarëve) me qëllimin e vetëm që këta këshilltarë t’i kthehen shpejt dhe qartë agjendës politike dhe programit të punës të degës së PDK-së në Gjilan e që është plotësisht në funksion të zhvillimit dhe mirëqenies së qytetarëve të Komunës tonë, thuhet në një prononcim të Degës.
