Pranvera e helmuar e vitit 1989

Më 21 mars 1989, ditën e pranverës, në Kosovë ndodhi helmimi masiv i rinise shkollore dhe universitare, shkruan Mediafokus.

Helmimi ishte një strategji e planifikuar nga Serbia, për t’i shkaktuar pasoja afatgjata popullit shqiptar, duke ia rrezikuar të ardhmen përmes metodave më ç’njerëzore.

Helmime pati në shumicën e komunave të Kosovës dhe preku drejtpërdrejt mbi 7420 të rinj, përkatësisht një popull të tërë.

Helmime ndodhën edhe në Gjilan, që nga Serbia konsiderohej një nga qendrat e rëndësishme të vendimmarrjes.

Pikërisht në njërën nga shkollat e mesme të këtushme atë ditë po mbahej një mbledhje e Organizatës Themelore të Lidhjes Komuniste, ku kishin ardhur aktivistë nga Beogradi.

Helmimi ndodhi në shkollën pranë, saktësisht në kohën kur po mbahej mbledhja.

Përnjëherë i tërë qyteti doli në rrugë për të parë se ç’po ndodhte dhe për të ndihmuar në bartjen e nxënësve të helmuar drejt spitalit.

Populli po reagonte në panik. Nga nxitimi pati edhe aksidente të lehta me vetura.

Ndihma mjekësore po jepeshin edhe jashtë spitalit, në rrugë.

Policë të shumtë, kryesisht civilë, mes tyre edhe ndonjë shqiptar, ishin vendosur gjithandej hapësirave të spitalit për të vëzhguar zhvillimet dhe sigurisht për t’i identifikuar mjekët dhe qytetarët që po ndihmonin të helmuarit.

Serbia e cilësoi aktrim këtë gjendje.

Shumë të rinj, sidomos femrat, janë përballur gjatë me pasojat. Disa prej tyre, ndoshta edhe tani i vuajnë pasojat e asaj pranverore të helmuar./Mediafokus.info