Qeveria shqyrton nesër Projektligjin për Paga
Projektligji për Paga, nesër mund të dal për shqyrtim në mbledhjen e radhës së Qeverisë së Kosovës.
Gazeta Express ka siguruar një dokument, që mund të ndryshojë, i cili përmban Rendin e Ditës të mbledhjes së 109 të Qeverisë së Kosovës, që do të mbahet nesër, 23 nëntor 2022 nga ora 10:00.
Projektligji për Paga kishte dalë në Konsultim Publik më 15 shtator të këtij viti, në një kohë grevash të punëtorëve të sektorit publik dhe përplasjesh të ashpra mes sindikatave dhe Qeverisë.
Projektligji për Pagat ka për qëllim kryesor përcaktimin dhe rregullimin e sistemit të pagave dhe shpërblimeve për të gjithë të punësuarit që përfitojnë pagë nga buxheti i Kosovës.
Nga kjo kategori e cila mbulohet me këtë projektligj, përjashtohet vetëm Agjencia Kosovare e Inteligjencës, për shkak të natyrës së saj të funksionimit.
Me daljen në konsultim publik, Qeveria kishte publikuar edhe koeficientët për pozitat sipas hirearkisë dhe rëndësisë së institucioneve. Vlerat e koeficientit mund t’i gjeni këtu.
Sindikata e Bashkuar e Arsimit, Shkencës dhe Kulturës e Republikës së Kosovës (SBASHK), e kishte mbyllur grevën njëmujore në fundshtator, pa arritur objektivat e saj. Sindikata, në krye me Rrahman Jasharajn, i ka dhënë kohë Qeverisë që t’i plotësojë kërkesat e saj deri në fundvit.
