Ragip Begaj lirohet nga akuza për korrupsion, Apeli hedh poshtë aktgjykimin e Themelores
Ish-kryetari i Komunës së Malishevës, Ragip Begaj, muaj më parë ishte dënuar nga Gjykata Themelore në Prishtinë me gjashtë muaj burgim, nën akuzat për korrupsion. Ky aktgjykim i Themelores është hedhur poshtë nga Gjykata e Apelit, e cila ka liruar nga akuzar Begajn, me një vendim të marrë më 28 korrik.
Me aktgjykimin e Gjykatës Themelore në Prishtinë Begaj ishte shpallur fajtor për veprën penale keqpërdorim i pozitës apo autoritetit zyrtar dhe ishte gjykuar me dënim me burgim në kohëzgjatje prej gjashtë muajve, i cili dënim me pëlqimin e të akuzuarit i ishte zëvendësuar me dënim me gjobë në shumë prej 5000 euro.
Gazeta Sinjali ka siguruar aktgjykimin që u mor nga trupi gjykues i Apelit, ku thuhet se është aprovuar si e bazuar ankesa e avokatit mbrojtës të Begajt lidhur me aktgjykimin e Themelores në Prishtinë.
Begaj akuzohej se me dashje dhe duke shfrytëzuar autoritetin zyrtar i ka tejkaluar kompetencat e tij, duke i shkaktuar dëm Rexhep Rudit dhe buxhetit të Komunës së Malishevës me rastin e ndërtimit të një shkolle në fshatin Drenoc.
