Shqiptarët ndihmojnë popullin gjerman në përballimin e fatkeqësisë natyrore
Përmbytjet në Evropë kanë shkaktuar vdekjen e mbi 150 personave vetëm në Gjermani, derisa qindra të tjerë rezultojnë të zhdukur.
Pas dëmeve jashtëzakonisht të mëdha, disa shqiptarë kanë shkuar në Bad Neunar për t’i dalë në ndihmë popullit gjerman.
Lulzim Hajdaraj i cili ka dërguar fotografi në redaksinë e Klan Kosova, ka treguar se dje bashkë me disa miq ishte në këtë qytet i cili është përmbytur nga uji.
“Atje pamë që njerëzit ishin të frustruar dhe të habitur se si ekzistenca e tyre brenda një kohe aq të shkurtër kishte humbur tërësisht, qyteti ishte rrënuar pothuajse i tëri”, tha Hajdaraj në Facebook.
“Ne shkuam sadopak që t’i dalim në ndihmë atyre njerëzve që në kohën e vështirë që ne e përjetuam në luftë na ndihmuan dhe vazhduan të na ndihmojnë edhe sot”.
Ndër të tjerash, Hajdaraj bëri thirrje që secili që ka kohë dhe mundësi ta bëjë të njëjtën gjë, sepse është e duhur dhe e mirëpritur nga banorët.
Edhe shqiptarë tjerë janë duke ndihmuar ekipet gjermane të shpëtimit në terren, siç është djaloshi nga komuna e Vitisë, Ramiz Sylejmani. Ai nuk ka pritur ftesë nga askush, por me vetiniciativë ka vënë në shërbim veten e tij në betejën e përbashkët njerëzore kundër fuqisë së natyrës, e cila po merr jetë dhe po shkakton dëme të mëdha materiale.
