S’ka subvencione për izolim të shtëpive këtë vjeshtë, kjo është arsyeja

Familjet kosovare që kanë ndërtuar shtëpi, apo edhe i kanë pa izolim të jashtëm, këtë vit nuk do të mund të aplikojnë në programin për subvencionim.

Kjo sepse Fondi nuk ka buxhet në dispozicion për projekt të tillë.

Nga FKEE-ja bëjnë me dije se ka ende qytetarë që nuk kanë dorëzuar dokumentacionet për disbursim, si nga thirrja e vitit të kaluar, ashtu edhe nga viti 2023.

Fondet për subvencionimin e masave të efiçiencës së energjisë në shtëpitë individuale, kanë qenë të ndara nga Bashkimi Evropian, si pjesë e pakos së rimëkëmbjes nga kriza energjetike, të siguruara përmes Qeverisë së Republikës së Kosovës”.

Në vend të subvencionimit për shtëpitë individuale, FKEE-ja ka shpërngulur vëmendjen në në një tjetër projekt me rëndësi për efiçiencë.

FKEE-ja deklaron se është në përgatitje e sipër të fillimit të projektit në 400 ndërtesa publike të nivelit lokal dhe qendror në të gjithë territortin e Republikës së Kosovës.

“Ky është projekti më i madh i këtij lloji në vend, i cili do të realizohet nga FKEE-ja në bashkëpunim me Ministrinë e Ekonomisë, Ministrinë e Financave, Punës dhe Transfereve dhe Bankën Evropiane për Rindërtim dhe Zhvillim (BERZH)” deklaroi FKEE-ja për IndeksOnline.

Me këtë rast, bëhet me dije se thirrja për aplikim nga ana e komunave që dëshirojnë të bëhen pjesë e implementimit të këtij programi, do të hapet në tremujorin e fundit të vitit, teksa Fondi për Efiçiencë i fton komunat të përfitojnë nga ky projekt.

“Thirrja për aplikim të komunave do të hapet në tremujorin e fundit të vitit, ndërsa ftohen të gjitha komunat që deri më tani nuk kanë raportuar stokun e ndërtesave publike, ta bëjnë këtë deri më 25 gusht 2025 dhe t’i likuidojnë borxhet aktive ndaj FKEE-së deri në shtator 2025.”

Të pyetur nga IndeksOnline nëse mungesa e fondeve është rrjedhojë e mungesës së projekt-propozimit nga ana e Ministrisë së Ekonomisë, nga Fondi i Kosovës për Efiçiencë të Energjisë thonë:

“Jo, nuk ekziston ndonjë varësi e këtillë. Aktualisht FKEE-ja është duke punuar me kapacitet të plotë në përfundimin e projekteve intensive që tashmë janë në implementim, si renovimi i 17 objekteve publike, rehabilitimi i 28 ndërtesave sociale për familje në nevojë, përgatitja e projektit për 400 ndertesa publike, si dhe zhvillimi i një projekti tjetër për SME-në, në bashkëpunim me Ministrinë e Ekonomisë. Për projektet e reja në sektorin rezidencial parashihet të punohet në fazat e ardhshme, pas përfundimit të projekteve aktive.”

Për dy vjet radhazi, FKEE-ja u mundësoi qindra familjeve të subvencionojnë shumicën e shpenzimeve në izolimin e shtëpive.

Në kuadër të këtij subvencionimi u mundësua termoizolimi i mureve të jashtme, termoizolimi i kulmit dhe ndërrimi i dyerve dhe dritareve të jashtme.