Trump: Pas fitores ndaj Iranit, çmimet e naftës do të bien ndjeshëm

Presidenti amerikan Donald Trump ka thënë se çmimet e naftës do të bien ndjeshëm pas përfundimit të konfliktit me Iranin.

Në një postim në platformën Truth Social, Trump tha se çmimet e energjisë do të bien me shpejtësi pasi, sipas tij, Shtetet e Bashkuara të fitojnë luftën me Iranin.

Ai parashikoi që çmimi i benzinës fillimisht të zbresë në rreth 3 dollarë për gallon dhe më pas të bjerë edhe nën 2 dollarë.

Trump e lidhi uljen e çmimeve me përfundimin e konfliktit, duke argumentuar se përfundimi i luftimeve do të sillte një stabilizim të shpejtë të tregjeve energjetike.

Megjithatë, në tregjet ndërkombëtare, çmimet e naftës kanë vijuar të mbeten të larta për shkak të tensioneve në Lindjen e Mesme. Sipas të dhënave të raportuara të martën, Brent tregtohej rreth 97 dollarë për fuçi, ndërsa WTI mbi 92 dollarë, mes shqetësimeve për furnizimet globale dhe trafikun e kufizuar në ngushticën e Hormuzit.

Në të njëjtën deklaratë, Trump përsëriti qëndrimin e tij se Irani nuk do të pajiset me armë bërthamore, duke e paraqitur këtë si një nga objektivat kryesore të politikës së Uashingtonit ndaj Teheranit, shkruan Euronews.al.

Deklaratat e presidentit amerikan vijnë në një kohë kur tensionet mes dy vendeve mbeten të larta, ndërsa çdo ndërprerje e mëtejshme e furnizimeve përmes Gjirit Persik mund të ndikojë drejtpërdrejt në çmimet globale të energjisë.