Zgjerohet kufizimi i lëvizjes së qytetarëve edhe në 4 komuna tjera të Kosovës, përfshihet edhe Gjilani (?)

Qeveria e Kosovës pritet të vendosë sot për kufizimin e lëvizjes së qytetarëve edhe në 4 komuna tjera të Kosovës.

Komunat e reja që do të përfshihen në këtë pako të masave shtesë, nëse miratohet propozimi, do të jenë Mitrovica e Jugut, Gjilani, Fushë Kosova dhe Shtërpca.

Kjo masë nënkupton ndalimin e lëvizjes së qytetarëve nga ora 21:00 deri në orën 05:00 të ditës së nesërme.

Para një jave, qeveria vendosi ta ndalojë qarkullimin e qytetarëve në po të njëjtin orar në Prishtinë, Ferizaj, Prizren e Vushtrri.

Qytetarët, do të lejohen të dalin në këtë orar vetëm në raste urgjente shëndetësore, në rast të nevojës për t’u kujdesur për të sëmurë, për persona me nevoja të veçanta, vetëm nëse të sëmurët apo personat me nevoja të veçanta nuk kanë mundësi të kujdesen për vetveten,

Gjithashtu, qytetarët do të lejohen të dalin në rast të kërkimit të ndihmës nga institucione përkatëse, siç është rasti me viktimat e dhunës familjare, në rast të vdekjes së anëtarit të familjes, në rast të paraqitjes së nevojave për dalje jashtë shtëpisë/banesës për nevojat fiziologjike të kafshëve, por jo më larg se 500 metra nga banesa/shtëpia./mediafokus.info