Boza, ja si e bëjnë shqiptarët këtë pije freskuese mijëra vjeçare

Boza është një pije freskuese e dendur dhe me shije të thartë. Në Shqipëri prodhohet nga mielli i misrit, por ajo eshte e përhapur në shumë vende te Ballkanit në lloje të ndryshme. Në Egjipt njihet si ‘būẓa’ dhe zakonisht prodhohet nga elbi.
Boza ka katër përbërës kryesorë: miell misri e gruri, sheqer dhe ujë. Në Shqipëri, boza është prodhuar kryesisht në zonën veriore të vendit, në veçanti në zonën e Kukësit.
Boza shqiptare dallon nga bozat e prodhuara në vendet e tjera duke pasur përbërës kryesor të sajin misrin, ndryshe nga llojet e saj në Turqi, Bullgari e Maqedoni ku mund të jetë gruri, elbi, meli ose dhe qiqrat.
Boza është një pije e lashtë që ka origjinën në Mesopotaminë e lashtë, ku përmendet që 8000-9000 vjet më parë. Turqit e sollën këtë pije në Ballkan pas shekullit të XIII.
Emri boza vjen nga fjala perse buze që do të thotë miell. Në shekullin e XIX, boza shqiptare u bë shumë e kërkuar, duke u bërë dhe lloji mbizotërues i bozës në Perandorinë Osmane.
Ja si behet boza: 
• 500 g miell misri
• 5 litra ujë të vakët
• 20 g tharmë (maja) buke
• 500 g sheqer
Pergatitja:
Në një enë (tenxhere) matet mielli, i qitet uji i vakët dhe lihet të qëndrojë disa orë (më së miri është të përgatitet në mbrëmje).
Pas qëndrimit, tenxherja vihet në zjarr të mesëm dhe zihet rreth dy orë. Përzihet here pas here, më së miri me garuzhdë.
Mielli i zier pastaj hiqet nga zjarri dhe lihet të ftohet. Ndërkohë përgatitet tharmi, përzihet me dy decilitra ujë të vakët dhe qitet në miellin e zier.
Përzihet mirë dhe lihet ashtu. Në mëngjes, ditën e dytë, lëngu kullohet nëpër një pëlhurë të bardhë.
Bozës i shtohet sheqer sipas shijes, ftohet mirë dhe shërbehet me pak akull.
Boza e përgatitur kështu është më mirë të shpenzohet për dy-tri ditë, sepse pas kësaj kohe, mund të marrë shije shumë të thartë.