Haziri: Gratë që përfaqësojnë bizneset lokale i kanë dhënë brend dhe renome Gjilanit

Kryetari aktual dhe i ardhshëm i Gjilanit, Lutfi Haziri, ka marrë mbështetje të fuqishme nga zonjat afariste, në tubimin e organizuar nga Forumi i Gruas së LDK’së, nën respektimin e masave anti-COVID-19.

Kryetari Haziri, gjatë takimit në formatin e bashkëbisedimit, ka falënderuar gratë afariste për këtë përkrahje në garën e 17 tetorit, teksa ka theksuar se me brendet e tyre, i kanë dhënë brend dhe renome Gjilanit.

“Të gjitha gratë prezente që i përfaqësojnë bizneset lokale, i keni dhënë brend dhe renome Gjilanit, duke na bërë krenarë ne të gjithëve. Në kuadër të mbështetjes për gratë, ne e kemi implementuar programin tim të përzemërt “Gratë në Biznes”, me mbështetje të fondeve IPA të BE’së. Në vitin e parë të qeverisjes, do të gjejmë mundësi që t’i subvencionojmë bizneset e prekura nga pandemia, me të gjitha kapacitetet komunale, për operim sa më të suksesshëm”, ka thënë Haziri.

Të pranishmëve i është drejtuar me mesazh të fitores edhe kryetarja e Forumit të Gruas së LDK në Gjilan, Valentina Bunjaku-Rexhepi, e cila theksoi se asnjëherë nuk ka munguar përkrahja e Komunës për gratë, në veçanti ato afariste për funksionimin më të suksesshëm të veprimtarive.

Në këtë tubim, kanë dhënë mesazhet e tyre të fitores edhe kandidatet për asamble nga radhët e LDK’së: Shpresa Kurteshi Emini (3), Afërdita Balaj – Ajdini (9), Jehona Maliqi (18), Diana Toska (12), Teuta Suliqi (15), Mizafere Ismajli (23), Drenushë Maloku (27), Drita Maliqi- Zumqe (30), Kadime Berisha (36).