Hysni Xhemajli, 16-vjeçari që zgjodhi uniformën e luftës para kompleteve të maturës

Hysni (Ramiz) Xhemajli është njëri nga dëshmorët më të rinj të Kosovës, i cili ra duke luftuar për çlirimin e trojeve shqiptare, në luftën e Maqedonisë, nën emblemën e UÇK-së, shkruan Mediafokus.info

Ai tani do t`i kishte 42 vjet, po të ishte në jetë (12.03.1984-10.06.2001).

Pas përfundimit të luftës në Kosovë, i vetëdijshëm se betejat për çlirimin e tokave shqiptare nuk kishin përfunduar, Hysniu iu bashkua Ushtrisë Kombëtare në Maqedoni.

Ndonëse i ri për nga mosha, në vetëdijen e tij ishte pjekur kaherë ndjenja e atdhedashurisë, duke qenë me origjinë nga një familje me pikëpamje patriotike.

Morali i tij luftarak ishte i lartë, ndërsa për moto kishte thënien “Kudo që flitet shqip, është vendi im”.

Kur Kosova u përfshi në luftë, ai ende nuk i kishte mbushur 14 vjet, por në shpirt e zemër i vlonte gjaku dhe gjakimi për liri dhe shpeshherë u thoshte shokëve dhe miqve se kjo gjendje nuk mund të durohej.

“Kosova ka nevojë të jetë e lirë, sikur të gjitha vendet dhe popujt tjerë të botës”, thoshte ai.

Edhe pse shumë i ri në moshë, Hysniu filloi të ndërmerrte veprime konkrete për realizimin e ëndrrës shekullore për çlirimin e Kosovës, duke u kujdesur për ushtarët e UÇK-së që ishin të pozicionuar në fshatin e tij.

I ndihmonte ata duke u dërguar ushqime dhe shpeshherë bënte edhe roje ditë e natë.

Lagjja e tij njihet historikisht si strehë e kryengritësve shqiptarë, të cilët nëpër shekuj luftuan kundër pushtuesit.

Këtu, kaçakët shqiptarë, kryengritës të kohës, gjithmonë kanë gjetur strehë, besë e bukë.

Pas mbarimit të luftës në Kosovë, Hysniu vazhdoi mësimet aty ku i kishte ndërprerë në vitin 1999.

Nuk e zinte vendi-vend që t`i bashkohej luftës në Preshevë dhe Maqedoni, por për shkak të moshës, nuk e pranonin të rreshtohej nën emblemat e lirisë së këtyre trojeve.

Hysniu s`e kishte frikë luftën, as plumbin, sepse ai mendonte vetëm për lirinë.

Kur ranë krismat e para në Sharr të Tetovës, Hysniu nuk priti më, i la bankat e shkollës dhe u rreshtua në frontin e luftës.

Familjes i la amanet që ta përcjellin tutje mesazhin “Kudo ku flitet shqip, është vendi im”.

Bashkimi me UÇK-në, ishte aspiratë e tij jetësore. Në Brigadën 112 “Mujdin Aliu” u dallua për trimëri, aftësi ushtarake dhe shkathtësi luftarake.

Më 10 qershor 2001 u plagos rëndë nga forcat sllavo-maqedonase dhe nga plagët e marra ndërroi jetë në spitalin e Prizrenit.

Hysni Xhemajli, pa arritur të kryente maturën, pa arritur t`i vishte rrobat e dhëndrit dhe pa e pritur dasmën e vetë, zgjodhi uniformën e UÇK-së dhe u martua me lirinë e vendit të tij, që e kishte ëndërr jetësore.

Dëshmori Hyseni Xhemajli është varrosur me nderime ushtarake e qytetare në Gjilan, në varrezat e dëshmorëve, ku në çdo përvjetor të rënies së tij, vijnë për nderime familja nga Vërbica e Gjilanit dhe Sllovia e Lipjanit.

Hysni Xhemajli ishte fëmija i katërt i Ramiz e Minire Xhemajlit.

Arsimtari Lulzim Zymberi ka bërë një dedikim sot për dëshmorin Hysni Xhemajli, në 25-vjetorin e rënies heroike.

Hysniu ishte një nxënës shumë i zoti në mësime, por ishte edhe kërkues e sidomos i interesonte historia shqiptare.

Gjatë luftës së UÇK-së në Kosovë, edhe pse Hysniu ishte i ri në moshë, dha një kontribut të madh.

Edhe pse në moshë të re Hysniu merr rrugë drejt Maqedonisë dhe i bashkohet Ushtrisë Çlirimtare Kombëtare, sepse në mendjen e Hysniut ishte dëshira që aty ku flitej gjuha shqipe të sillej liria dhe të valonte flamuri kombëtar.

Rënia e Hysniut përkon edhe me datën e madhe kombëtare shqiptare Lidhjen Shqiptare të Prizrenit e cila po ashtu kishte për qëllim çlirimin dhe bashkimin e gjithë trojeve shqiptare. /Mediafokus.info