Ky është fshati ku 8 vjet nuk lindi asnjë fëmijë
Në një fshat në Itali, 8 vjet nuk lindi asnjë fëmijë. Banorët e fshatit më të vogël të Italisë, tani po festojnë ardhjen në jetë të një banori të ri – Denisit.
Fshati me 28 banorë, tani pas 8 vitesh, me ardhjen në jetë të vogëlushit, ka 29 vetë.
“Ky është vërtet një moment kremtimi për të gjithë komunitetin”, tha për Corriere della Sera kryetarja e komunës së Morterones, Antonella Invernizzi, transmeton Shqip.
Prindërit e Denisit, Matteo dhe Sara, ndoqën traditën italiane të njoftimit të lindjes së fëmijës, duke vendosur një shirit – blu në derën e shtëpisë, e duke treguar kështu njëkohësisht se ishte djalë.
Hera e fundit që në fshat ishte parë një shirit i tillë ishte në 2012-n, kur lindi një foshnje vajzë. Sara rrëfeu sesi ishte shtatzënia e saj në kohë pandemie, kur koronavirusi goditi rëndë të gjithë rajonin e Lombardisë, por kurseu Morteronen, banorët e të cilit megjithatë u treguan të kujdesshëm.
“Nuk është e lehtë të presësh në fëmijë në kohë të tilla. Nuk del dot lirisht nga shtëpia e nuk ke mundësi të vizitosh të afërmit”, tha ajo. Ardhja në jetë e Denisit vjen në kohën kur vendi shënoi për 2019-n 420.170 foshnje të lindura- niveli më i ulët ky i lindshmërisë atje që nga fillimi i regjistrimeve në 1861.
