Mediat gjermane: Fatjona, pianistja më interesante e brezit të saj

“Fatjona Maliqi dallohet si një nga pianistet më interesante të brezit të saj me një prirje të veçantë për programet që janë jashtëzakonisht shumë sfiduese për instrumentistin”

Dashamirët e muzikës nga Rheinbach dhe rajoni mund t’i presë një mbrëmje e klasit të lartë e pianos në auditorin e Kolegjit Vinzenz Pallotti, shkruan blick-aktuell.de.

Të premten, më 17 janar, me fillim nga ora 7.30, pianistja e re master Fatjona Maliqi do të prezantojë një program solo me kërkesa jashtëzakonisht të mëdha, për të shënuar fillimin e vitit të Beethoven-it.

Solistja nga Kosova do të prezantojë pjesën e njohur si “Diabelli Variations op. 120”, veprën më të gjerë të pianos të kompozuar nga mjeshtri i njohur nga Boni, e cila zgjat afër një orë lojë, transmeton albinfo.ch. Programi plotësohet nga variantet që dëgjohen rrallë, të pjesëve të kompozitorit Robert Schumann në një temë të Beethoven-it.

Fatjona Maliqi dallohet si një nga pianistet më interesante të brezit të saj me një prirje të veçantë për programet që janë jashtëzakonisht shumë sfiduese për instrumentistin.

Kohët e fundit, ajo ka fituar njohje në qarqet e specializuara me performancën e saj “Variacionet e Goldbergut” nga J. S. Bach, me të cilën ka interpretuar edhe në Rheinbach, përcjell albinfo.ch. Kritikët duke e komplimentuar Fatjonën kanë theksuar se ajo e luan këtë pjesë “si të ishte diçka shumë e lehtë”.

Si pjesë e studimeve të saj, ajo është veçanërisht e interesuar për të luajtur në instrumente historike me tastierë. Gjatë këtij viti, ajo do të regjistrojë në CD “Variacionet Diabelli” në një piano madhështore historike nga Koleksioni Beetz, transmeton albinfo.ch. Po ashtu Fatjona do të luajë drejtpërdrejt në fund të konferencës së 42-të ndërkombëtare të Shoqatës Evropiane të Mësuesve të Pianos në sallën e muzikës së dhomës (kamertale) në Beethovenhaus në Bon.

Pianistja e re është trajnuar në klasën e pianos së Heribert Koch, në Universitetin e Muzikës në Münster në vitin 2015.

Foto: Heribert Koch/Mediafokus/